圖:網上圖片

第二屆香港單車節本月25日舉行,今年30公里和50公里賽道都會踩單車上天橋。得返不夠一個月備戰,旅發局表示,除了要練車,「食好啲」攝取營養都好重要。

香港營養師協會會長林思為教路,賽前要攝取足夠碳水化合物及蛋白質。以一名65公斤的休閒車手參加30公里賽事為例,現在起每日要食6至9碗飯,以及300至500克肉類。參加50公里又會踩超過90分鐘,賽前一兩日就進行「醣原負荷」,每公斤體重攝取7至12克碳水化合物,並調低運動量,增加耐力。到賽前2小時不要空肚運動,最好食低脂及低纖維食物,2至3片白方包或1、2隻香蕉,再飲一支500毫升運動飲品就夠。

單車設計師方家進就建議參賽者檢查單車前後車輪、車頭操控盤、剎車系統、腳踏及座位等,最緊要安全第一。

旅發局都希望下半年的盛事活動吸引旅客,昨公布7月訪港旅客量按年回升百分之2.6,有近505萬人次;但首7個月仍按年跌百分之6,有3220萬人次。7月的內地客有390萬人次,按年升百分之2.2,長短途都升,尤其南韓客按年勁升3成。