五十二歲妻子第一胎生女。藝人黃澤鋒上周慶祝囡囡滿月,仍驚魂未定。回憶產房奇遇,恍如身處天堂與地獄之間。娛樂圈生仔新聞本家常便飯,從來冇如此嚇人……

    

“開刀時候,太太有妊娠毒血,醫生話佢有機會中風。咁就大件事。”黃澤鋒訴衷腸,慶祝囡囡滿月,有甚麼高興得過兩母女險死還生,“我是佛教徒,唸齊所有經文。護士對我講,你望右,不要望左。左邊係搶救緊我老婆,右邊係我個女……我第一次去摸我個女時,佢在氧氣箱,有小小肺積水。我再入ICU時候,喊到阿媽都唔認得,我已經五十幾歲人,唔想畀人睇到,我係男人,如果我倒下,呢頭家就出事。”

    

結婚八年後才生下女兒,為了孭起成頭家,黃澤鋒說要永不言休。“我對太太講,我可以辛苦啲,但冇諗過退休。”現實,比戲劇還戲劇,入行三十年的藝人,早已沒有幕前拍劇演出;而是教拳、教游泳,有時教藝訓班。“有工就做,養佢兩母女,小朋友最少養二十一年,我今年五十二歲,到七十五歲做教練都沒有問題。時下有些教練,八十歲還教游水。”

    

黃澤鋒,眞正的戲劇人生。無線藝訓畢業,一直做配角,“唔緊要,其實要做好一個配角都好難,你睇吓Benz雄(許紹雄)。”雖然做配角也甘之如飴,無奈戲金太奀,“學了二十五年藝,是否外闖一次呢?”跳槽!他轉戰火鍋店老闆,因沙士欠下一身債。做酒吧,日日天光六點才收工。對於飲酒為業的生涯,阿鋒是喜更是悲,“搵錢唔錯,但係,你要畀返晒醫生。我每一日都醉,六點正,便有一部的士在門口等我,不知如何又返到屋企。”

    

第一段婚姻無疾而終,再贏得姻緣,驚險萬狀添個女兒,大半生藝人搖身變體育教練,“點解我條命永遠係咁?我對太太講,如何捱苦也好,睇住女兒長大,便捱得開心。”

    

來源:澳門日報