人生有幾多個十年?十年没有演電視的羅冠蘭,上場了,《牛下》演鋼琴老師,教五個中佬唱歌。最有趣味的是,與鍾景輝同台——兩人曾兩度發生「師生關係」。

「入大學前的暑假,我加入無線訓練班。」羅冠蘭説:「King Sir係導師,同學有周潤發、林嶺東、盧海鵬。全班最老土係我,紮兩條牛角辮上堂,佢哋笑我似螞蟻。」

「之後我入讀浸大,有個戲劇課程,又係King Sir教,我即刻選咗佢課程。」羅冠蘭他校遇故師,「四年歷史系,King Sir教的課我都有上。」其實,她自小的志願是教書。

大學畢業後兩年在中學任教歷史和地理,羅冠蘭由課室跳上舞台,只因香港話劇團招臨時工,「我去考,卻獲聘做全職演員,入咗演藝都係教書。我覺得没有離開我的志願,做戲做老師,呢世人都係做緊呢兩樣嘢。」

魚與熊掌兼得,前年,憑《寵我》在各地影展,羅冠蘭贏了十座女主角奬。

演技須從磨礪來,當上話劇團首席演員後,受訪時曾口快快説:「話劇圈子都有黑暗一面。」掀起風波,受到攻擊的羅冠蘭一再澄清 :「不如咁諗啦,如果你覺得任何一個藝術圈係冇黑暗點嘅,如果你眞係覺得冇,我覺得你太天眞囉。如果你眞係相信有,而你唔肯去承認,我覺得唔係一個創作人應有的態度。」

首席演員、戲劇教師,進入電視圈都要重新學習,「舞台化演繹,嘩,咁鬼誇張口架,有觀衆可能好憎我。好一段時間後,我才懂得電視圈的運作。」大師級人馬進入公仔箱,竟要藝訓初哥教演戲?「王喜比較認真,覺得劇本有問題,我覺得冇問題,商量一下,互相適應囉。不料就傳出他教我演戲,仲以為我對記者講,眞係冇呀,終於大家都明白。」

回首電視十年,最牽動羅冠蘭的,就係《烈火雄心》的「南山三虎」與王喜 :「該劇每次重播,都掛住佢哋。」十年一度燕歸來,給記者的仍是演藝教師名片,羅冠蘭的愛情成績表呢?(羅冠蘭冇悔冇憾 :二之一)

來源:澳門日報