明知台有窿,偏向窿中行!古巨基墮台後繼續負傷演唱。“作為一個戰士,當然會有些傷。還有,我在哪裡跌倒,就在哪裡站起來。”蹬,蹬,蹬,大踏步到舞台洞邊,復仇式狂踩幾下,“踩你!踩你!”

歡呼及掌聲頓起,謝天謝地,古巨基合十,公佈傷勢——“當晚完騷往醫院檢查,骨沒事,因為向後跌……”基仔侃侃道來:“跌下去時,不是頭着地,是背脊……幸好背脊有些肉,所以沒甚麼大礙。不過,我的背脊、膊頭、後面頸肩位、前面頸位都拉傷。肌肉變得繃緊,所以,我唱高音時可能唱得更高,會更好聽……”演唱會流行“講唱會”,必加插一些內幕或動人故事。

料不到古巨基卻有神來之筆:“講吓我老婆啲新嘢……”基仔爆私隱:“我對醫生講,跌親背脊,還有個Pat Pat。醫生叫我太太幫眼睇,我就拉低咗半條褲……問有冇瘀呀?我太太話瘀就冇,不過,橙皮紋有好多。我眞係要多謝老婆,驚魂未定時候,還為我帶來歡樂。所以,我眞係好鍾意返屋企。”

隨而唱出《愛回家》。基仔又話:“爸爸媽媽每晚都有來,見我墮台都好驚。平日因工作飛來飛去,多數同爸爸通吓電話,佢成日問我做嘢開唔開心?我想借在座的掌聲,話畀我爸媽知,好多人惜我。”全場鼓掌。

    

唱完《獨自去偷歡》後,劉德華擁抱古巨基說:“我跌完,你又跌,眞係慘。”華仔又説:“我前晩看新聞嚇一跳,以為今日我要一個人唱完場。哈哈,冇事的……我這樣跌(墮馬撕裂盆骨)都冇事,不過,我一跌就一年,你只是一日啫。”華仔拉着基仔站台前,面對歌迷説:“我們未來,無論有多少次跌倒,在支持者面前,永遠都係一個巨人。”華仔自喻為“同是天涯淪落人” ,他興奮宣佈:“我冇事啦,好快開演唱會,你哋一定要來,若果話唔來,我會報復口架。”

    

大吉利市,不是“淪落”,一時同病相憐而已。二人兄弟情緣結於起步——基仔入行時與華仔同一間公司。“我好多謝華仔哥當年的支持和鼓勵。我找到第一次合照。一九九一年,在清水灣電視城影的,你一樣咁靚仔……”二人於是按照當年的甫士再來一張合照。

    

來源:澳門日報