朱千雪與岑杏賢結伴,在網台開設《心理急救室》。中試放榜前夕,有十七歲學生妹“大叫救命”求助:自認“A0”!有冇藥可治?

    
娛樂新聞永遠站在潮流浪尖,又係學潮語時候了。急救室主持人之一岑杏賢解釋——求救女子乃中六學生,見身邊好多同學開始拍拖,自己仍然是A0(Available 0)。

    
冇拖拍,唔使死嘅,心病還須心藥醫。朱千雪妙語如珠:“從未拍過拖,我覺得唔係一件唔好嘅事。但係,我唔理解,亦好唔認同呢種年輕人的心態。你結婚都係揀一個,完全唔覺得你之前拍過十次拖係叻啲囉。A0,有乜問題?你話十A就叻啲啫!”

    
“十七歲女仔驚冇拖拍,其實重點係想有人關心佢,希望有人錫佢。”岑杏賢補充:“有父母錫,都係被愛之中。”

    
“女仔拍拖,配額唔多。”朱千雪專家上身,一言蔽之:“唔好受社會壓力影響,唔好覺得拍拖係需求。無論拍過多少拖,丈夫只一個。”網民回應朱千雪金句,有説:“十二歲已拍拖啦。”有説:“現在的人,十七歲都已經A10。哈哈,千雪講嘢好有Point。”

    
美貌與智慧,一半天生一半努力。朱千雪加國成長,大學畢業即競選港姐獲季軍,簽約無線當藝員的同時,完成中大傳播學院碩士課程;馬不停蹄,到城市大學攻讀法律博士。千雪BB想轉行當律師,已跟隨某大狀實習。

    
身在娛圈,朱千雪深有所感:“今日有工作,不代表明天有工作。現在很多觀眾喜歡你,如果有日觀眾轉口味,我會如何?我不希望無得揀,讀書有樣好,日後我眞的離開,都不會脫節。”果然,某財經機構拍廣告,芸芸青春活潑靚女中,Miss朱成了唯一選擇,她以“專業人士”形象推介商品更見牙力云云。

    
來源:澳門日報