立法會主席梁君彥嘅國籍問題,近期炒得鬧哄哄。連經常上電視、建制派知名智囊:香港智明研究所研究總監許楨,都忍唔住出來抽水。佢喺《香港01》寫咗一篇《咪住,梁君彥幾時成為中國人㗎?!》,指梁君彥回歸後仍持有英國籍嘅同時,不但無放棄中國籍,反而可能喺回歸後,透過領取回鄉證或者特區護照,主動確認佢嘅「中國人」的身分。

之後佢又話,唔係任何港人都可去領回鄉證或特區護照,而是「必須符合系列條件」,包括「以中國為唯一國籍」。梁君彥如果拎住英籍,仲走佢申請回鄉證或特區護照,就有可能「違反《中國國籍法》」;若果佢申領特區護照,未如實填報佢持有英國國籍,則「涉嫌作出虛假聲明或陳述」。

嘩,指控好嚴重喎?不過係咪實情呢?如果你對《中國國籍法》有些少研究,甚至識得用google的話,都知道呢位「研究總監」,隨口噏當秘笈。


「中國人」身份不需主動確認

 

首先,大家用google search「香港 - 中國國籍」,就會發現入境事務處嘅官方網站,你click入去,就會發現一條叫「中華人民共和國國籍法」及有關「解釋」嘅link。你再click入去,就會發現《中華人民共和國國籍法》之外,仲有一份個名水蛇春咁長嘅《國籍法解釋》。

簡單來講,由於當年好多香港人移民,而原有《中國國籍法》第9條,又規定持有外國國籍嘅人,會自動喪失中國國籍。當年北京為吸引已經移民嘅港人回流,於是喺1996年制定咗呢份《國籍法解釋》。根據《國籍法解釋》,任何港人擁有華裔血統嘅,又或者喺香港出世,都會喺回歸後自動擁有中國國籍。就算你有居英權又好,你有BN(O)又好,你有十本外國passport都好,你都喺回歸一刻,自動擁有中國國籍。

記住,自。動。擁。有。你就算無申請過特區護照,無申請過回鄉證,你都唔會因此無中國籍。當日李波事件,英國外相夏正民因為李波有英國籍,提出交涉,中國外長王毅話李波「首先是中國公民」,就係based on《國籍法解釋》。同理,就算梁君彥無申請過回鄉證或特區護照,佢都係「首先是中國公民」。

當然,你要放棄中國籍,唔係無辦法,去入境事務處主動申請國籍變更,好似鄭宇碩當年就申請咗,後來走去申請特區護照,就搞到一鑊泡。即係話,法律上只有主動放棄中國籍,絕對無需要「主動確認」自己有中國籍㗎。

 

回鄉證、特區護照要「以中國為唯一國籍」?
 

其次,許楨話回鄉證、特區護照要「以中國為唯一國籍」,我又懷疑佢唔識用google。你google回鄉證,中旅社有條link話俾你聽,申請條件係乜:

1. 在香港出生, 具有中國國籍的香港永久性居民。
2. 內地居民經批准赴香港定居,取得香港居民身份的;
3. 在香港以外出生的的中國籍居民,已確立香港永久性居民身份的。
4. 香港永久性居民中的外國籍或者無國籍人士,經批准加入或恢復中國國籍的。


由於根據《國籍法解釋》,你就算有九個外國國籍,只要你無主動放棄中國籍,你喺香港都只會被人視作中國公民,所以申請回鄉證係無需「以中國為唯一國籍」㗎。你打開份申請表,根本無位亦無需要申報你有無外國國籍,「涉嫌作出虛假聲明或陳述」,你嚇鬼咩?

我地再睇睇特區護照申請表,佢一樣無位亦無需要申報你有無外國國籍,只有簽名位隔離有個「申請人聲明書」,圖中為聲明內容:

呢句「本人是中國公民及本人從未向香港入境事務處作出變更國籍的聲明」,就係因為你主動申請放棄中國籍,你就唔係中國公民,你就唔可以申請特區護照。請問邊處有「以中國為唯一國籍」呢個要求呢?許楨你連申請表都唔查,就出來抽水,點做研究總監啊?

說好的愛國愛港呢?

當然,我唔係話梁君彥回歸後十九幾年,都仲keep住個英籍無問題,而係你咪胡亂安插罪名吖?堂堂研究總監,連google都唔識用,真係會被人恥笑㗎?計我話,梁君彥最大嘅問題,係佢作為建制派,就算唔選立法會主席,就算選功能組別唔需要放棄英籍,都應該一早放棄英籍啦?你叫人愛國愛港,同時又揸住個英國籍,請問你愛邊個國啊?你自己就留定條後路,有乜依郁可以著草返英國,轉頭又叫港人相信一國兩制,即係點啊?

所以話建制派形象差,唔係無原因㗎。成日搵啲咁嘅人出來,你叫人點信你啊?